• Басты
  • АЭХА миссиясы Қазақстан Республикасының ядролық инфрақұрылымына кешенді шолу жүргізуде
31 Қазан, 2016 14:32

АЭХА миссиясы Қазақстан Республикасының ядролық инфрақұрылымына кешенді шолу жүргізуде

Атом энергиясын дамыту саласында ҚР мен Атом энергиясы жөніндегі халықаралық агенттіктің арасындағы ынтымақтастық жөніндегі жоспар аясында 2016 жылғы 31 қазаннан бастап 7 қарашаға дейінгі кезеңде Астана қаласында АЭХА өкілдері мен сарапшыларының қатысуымен Қазақстанның ядролық инфрақұрылымына кешенді шолу жөніндегі миссия (INIR – Integrated Nuclear Infrastructure Review) өтеді.
АЭХА миссиясы Қазақстан Республикасының ядролық инфрақұрылымына кешенді шолу жүргізуде

Делегация басшысы АЭХА Атом энергетикасы департаменті Ядролық энергетика бөлімінің директоры – доктор Дохи Хан (Dohee Hahn). Сондай-ақ делегацияның құрамына АЭХА-ның штаттық қызметкерлері және шақырылған халықаралық сарапшылар кіреді, деп хабарлады Энергетика министрлігі.

ИНИР миссиясының мақсаты – ядролық-энергетикалық инфрақұрылымының даму мәртебесін анықтау кезінде АЭХА-ға мүше мемлекетке көмек беру болып табылады. ИНИР, ағылшыннан аударғанда Integrated Nuclear Infrastructure Review «ядролық инфрақұрылымға кешенді шолу» миссиялары – атом энергетикалық бағдарламаны іске асыру үшін қажетті инфрақұрылымды кешенді бағалау. Инфрақұрылымды бағалау сұхбат, объектілерге бару және нормативтік құжаттарды шолу арқылы, сондай-ақ елдің өзін-өзі бағалауы бойынша есепке сүйене отырып, 19 өлшем бойынша (ұлттық ұстаным, ядролық қауіпсіздік, қаржыландыру және т.б.) жасалады.

Бір апта ішінде ИНИР миссиясы атом энергетиканы дамыту бөлігіндегі Қазақстанның атом инфрақұрылымының жай-күйін зерттейтін болады. Миссия жұмысына ҚР Энергетика министрлігі, ведомствоға бағынысты ұйымдар («ҚР Ұлттық ядролық орталығы» РМК, «Ядролық физика институты» РМК), «Самұрық-Қазына» ҰӘҚ» АҚ, «Қазатомөнеркәсіп» ҰАК» АҚ, «Самұрық-Энерго» АҚ, «KEGOC» АҚ және «Қазақстанның ядролық қоғамы» қауымдастығының өкілдері қатысады.

АЭС қауіпсіздік жүйесі және құрылысын қаржыландыру, заңнамалық-құқықтық қорды дамыту, қоршаған ортаны қорғау, электр желілерінің дайындығы, білікті кадрларды дайындауға байланысты мәселелер және т.б. талқыланатын болады.

ИНИР-дің есебін тыңдау және Қазақстанның атом инфрақұрылымының жағдайын жан-жақты зерттеудің нәтижесінде АЭХА сарапшылары ұсыныстары және ұсынымдарымен соңғы есепті береді, бұл Қазақстанның ядролық-энергетикалық инфрақұрылымын дамыту және күшейту жөніндегі ұлттық жоспарды жаңартуға мүмкіндік береді.

 

Барлық жаңалықтар