ШҚО-да жыл басынан бері 2 мыңнан астам пәтер пайдалануға берілді
31 Қазан, 2016 13:46
Ағымдағы жылдың қаңтарынан қыркүйекке дейін Шығыс Қазақстан облысында жалпы алаңы 197600 шаршы метр тұрғын үй пайдалануға берілді, деп хабарлады облыстың статистика департаменті.
Өткен жылдың сәйкес кезеңіне қатысты алғанда, тұрғын құрылысының өсу қарқыны 100,1%-ды құрады. Өңірде салынған тұрғын үйлер үлесі жалпыреспубликалық көлемнің 2,7%-ын құрады.
«2016 жылғы 9 айда 2022 пәтер пайдалануға берілді, бұл 2015 жылғы сәйкес кезең деңгейінен 8,0%-ға көп. Соның ішінде қолжетімді баспана құрылысы мемлекеттік бағдарлама бойынша 367 жалдамалы коммуналдық және 320 несиелік пәтер салынды», - делінген хабарламада.
Әдеттегідей тұрғын үй құрылысына ең көп үлес жұртшылық – облыстық көлемнің 37,8%-ын қосты, жеке меншік нысандағы кәсіпорындар 31,5%, мемлекеттік – 24,2%, шетел кәсіпорындары - 6,5%-ын салды.
Тұрғын үй құрылысына инвестиция 15650,2 млн. теңгені құрады.
