Нидерланды «ЭКСПО-2017» көрмесіне қатысуға белсенді дайындалуда

28 Қазан, 2016 09:16

Нидерланды Корольдігінің Сыртқы істер министрлігінде Қазақстан Елшілігінің қатысуымен голланд үкіметі мен «Royal Dutch Shell» компаниясы арасында «ЭКСПО-2017» халықаралық мамандандырылған көрмесі аясындағы ынтымақтастық туралы келісімге қол қою рәсімі өтті.

Рәсімге Нидерландының СІМ, «Royal Dutch Shell» компаниясының өкілдері, Қазақстанның Нидерландыдағы Елшісі Мағжан Ілиясов, Нидерландының Қазақстандағы Елшісі Дирк Коп, сондай-ақ «ЭКСПО-2017» көрмесіндегі Нидерландының ұлттық комиссары Ханс Дриссер қатысты, деп хабарлады ҚР СІМ.

Келісімде қомақты қаржылық қолдаумен қатар, Нидерланды үкіметі мен «Royal Dutch Shell» компаниясы арасындағы тығыз ынтымақтастық көзделеді.

Нидерландының ЭКСПО көрмесіне қатысудағы тәжірибесі зор. Бұл 1851 жылы Лондонда өткен бірінші дүниежүзілік өнеркәсіптік көрмеге қатысқан аз елдердің бірі.

Астанада өтетін көрменің «Болашақтың энергиясы» атты тақырыбы Нидерланды үшін ерекше өзекті. 2050 жылға қарай голландықтар елдің энергиямен қамтамасыз етілуін жаңартылатын энергия көздеріне толықтай көшіруге ниетті. Ол үшін елде 1000-нан астам жеке кәсіпорындар мен энергетикалық одақтарды біріктіретін Жаңартылатын энергетика қоры құрылған.

«ЭКСПО-2017» көрмесінің жаһандық демеушісі бола тұрып, «Royal Dutch Shell» Астанадағы көрмеде өз корпоративтік павильонын да таныстырмақ, онда компанияның болашақ энергиясы саласындағы озық ғылыми әзірлемелері мен инновациялары ұсынылады.

Барлық жаңалықтар