• Басты
  • Астанада балаларды мектепке дейінгі біліммен қамту деңгейі 84,2% құрайды

Астанада балаларды мектепке дейінгі біліммен қамту деңгейі 84,2% құрайды

27 Қазан, 2016 18:09
2016 жылы Астана қаласында 3-тен 6 жасқа дейінгі балаларды балабақшамен қамту деңгейі 84,2% (2015 ж. 64,5%) жетті. Бұл туралы бүгін брифинг барысында БАҚ өкілдеріне Астана қаласы Білім басқармасының басшысы Қасымхан Сенғазыев мәлімдеді.

Қ. Сенғазыев 2017 жылдан бастап балабақшаларға жолдамалар электрондық түрде www.e.astana.kz сайты арқылы берілетінін хабарлады.  Оның айтуынша, бұл мөлдірлікті қамтамасыз етеді.  Ата-аналар үйлерінен шықпай-ақ, балабақшаларға арналған жолдамаға ие болады.  

Бүгінде жүйе пилоттық түрде іске қосылған. Оған сәйкес жолдамалар мемлекеттік тапсырысы бар жекеменшік балабақшаларға берілуде. Жолдамаларды мемлекеттік балабақшаларға беруге қатысты ата-аналардың дерекқорын өзектендіру мәселесі пысықталу үстінде. Ересек топтардағы балалар мектептерге барғаннан кейін бос орындарды бөлу жұмыстары жүргізіледі (әдетте жылына 1 рет, сәуір-мамыр айларында).

Анықтама: Бүгінгі таңда елордада 49 472 баланы қамтитын түрлі үлгідегі 260 мектепке дейінгі мекеме жұмыс жасайды. Оның ішінде: 95 – мемлекеттік; 2 – ведомстволық; 115 – жекеменшік; 48 – шағын орталық. 3-тен 6 жасқа дейінгі балалар арасындағы балабақшаға кезек 25 550 баланы құрайды.

2016 жылдың 1 қазаны бойынша Астанада 0-ден 6 жасқа дейнгі балалардың саны 87 947 жетсе, оның ішінде 78 606 бала мектепке дейінгі мекемелерде орын алуға кезекке қойылған. Жылда туу көрсеткішінің және көші-қон үрдістерінің артуына байланысты мектепке дейінгі жастағы балалардың қатары көбейіп келеді.  Күн сайын мектепке дейінгі мекемеден орын алуға кезекке 90 бала тіркеледі.

Барлық жаңалықтар