Облыстағы салықтың 60%-ы шағын және орта бизнестен түседі – С.Ескендіров

6 Желтоқсан, 2013 12:33

Бүгін Орталық коммуникациялар қызметінің брифингінде Солтүстік Қазақстан облысының әкімі Самат Ескендіров СҚО-дағы салықтың 60 пайызының шағын және орта бизнестен түсетінін айтты.

«Облыстағы салықтың 60 пайызы шағын және орта кәсіпкерліктерден түседі. «Бизнестің жол картасы-2020» бағдарламасы жергілікті кәсіпкерлерге үлкен қолдау болды. Соның аясында несиелер алынып, өндірістік инфрақұрылым жасалып, өзге де жұмыстар жасалуда. 4 жыл ішінде облыста аталмыш бағдарламаны іске асыру үшін 4 млрд теңге бөлінді. Соның ішінде 1 млрд 100 млн-ы биыл бөлінді. Мемлекеттік қолдау шаралары 2005 жылмен салыстырғанда шағын және орта кәсіпкерліктермен айналысатындарға 77 мыңнан 100 мың адамға дейін артты. Осы уақыт аралығында тауар өндіру 4 есеге дейін көбейді», - деді С.Ескендіров.

2013 жылдың 10 айында шағын және орта кәсіпкерліктер субьектілері тарапынан 238,9 млрд теңгенің тауары өндірілген.

Сонымен қатар, облыста рұқсаттама процедураларын оңтайландыру бойынша бірқатар жұмыстар атқарылды. 5 түрлі 104 рұқсаттама құжаты электронды түрге алмастырылды.

Облыс әкімінің айтуынша, аталмыш бағыттағы жұмыстар алдағы уақытта да жалғасын таппақ. Келер жылы аталымыш құжаттар түрін 30-ға дейін көтеру жоспарланып отыр.

Бұдан бөлек, Ескендіров облыстың Ресей Федерациясының көршілес өңірлерімен әріптестік қатынастары жайлы да айтты.

«Облысымыздың географиялық орны Ресейдің Омбы, Түмен, Қорған облыстарымен әріптестік құруға мүмкіндік береді. Аймақтың КО елдерімен тауар айналымы 70 пайызды құрайды», - деді әкім.

Оның айтуынша, Кедендік одақ елдеріне облыстан өндірістік тауарлар, метал бұйымдары және құрылыс материалдары тасымалданады.

Жалпы, әкімнің айтуынша, СҚО әлемнің 70 елімен әріптестік құрады.