М.Варга: Қазақстан Мажарстанның Орталық Азиядағы стратегиялық әріптесі

«Қазақстан Мажарстанның Орталық Азиядағы стратегиялық маңызды әріптесі. Қазақстан біз үшін Еуропа мен Азия арасындағы көпір болып табылады. Мажарстан Қазақстанның мүдделерін, сондай-ақ Еуропалық одақпен ынтымақтастығын қолдайды. Біз Қазақстанды БҰҰ Қауіпсіздік кеңесіне тұрақты емес мүше болып сайлануымен де құттықтаймыз. Мажарстандық кәсіпорындар экономиканы әртараптандыруда, сондай-ақ  өңірлік және қалалық даму бағдарламасында қазақстандық компанияларға өз тәжірибесі мен білімдерін ұсына алады», - деді М. Варга.

Сонымен бірге, министр Мажарстанның 2017 жылы ЭКСПО көрмесіне қатысатынын да атап өтті. Оның айтуы бойынша, бұл елдер арасындағы экономикалық қарым-қатынастарда жаңа мүмкіндіктер ашады.

Еске сала кетейік, ағымдағы жылғы 8 ай қорытындылары бойынша Қазақстан мен Мажарстан арасындағы сыртқы сауда айналымы жуық шамамен 80 млн долларды құраған. Осы ретте 2005-2015 жылғы түсім мен шығынды ескергенде, ҚР экономикасына мажарстандық инвестициялардың жалпы көлемі 103,5 млн долларды құраған. Одан басқа, ынтымақтастықты дамыту үшін жағдайлар жасалған, елдер арасында стратегиялық кеңес құрылған, экономикалық ынтымақтастық бойынша үкіметаралық комиссия, іскерлік кеңес, сондай-ақ 40 млн доллар сомасына ауыл шаруашылығы жобаларын қаржыландыру бойынша бірлескен қор жұмыс істейді. Экономика саласында екіжақты халықаралық құқықтық шарттық негіздегі негізгі элементтер қалыптастырылған.

Ботагөз Айтжанова