ҰЭМ темір жол-паром транспорты арқылы жеткізілген тауарларға салық салмауды ұсынды (ФОТО)
17 Қазан, 2016 15:18
Темір жол-паром транспорты арқылы жеткізілген тауарларға салықтың нөлдік пайызын ғана салу керек. Бұл туралы Ұлттық экономика министрі Қуандық Бишімбаев Парламент Мәжілісі комитетінде салық салу және кедендік әкімшілендіру мәселесіне өзгерістер енгізу таныстырылымында айтты.
«Елдің транзиттік әлеуетін арттыру мақсатында өзгертулер енгізу қарастырылуда, оған сәйкес темір жол-паром арқылы тасымалданатын тауарлар халықаралық болып саналады, демек салық нөлдік пайызда салынады. Бүгінгі таңда темір жол көлігі арқылы Ақтау теңіз портына дейін тасымалдау халықаралық дәрежеге жатпайды, оған салынатын салық көлемі 12 пайызды құрап отыр», - деді Қ.Бишімбаев.
Сондай-ақ, министр айтып өткендей, әрекеттегі заңнама «қолжетімділік үшін төлем» механизміне енген оңтайландыруға өзгертулер енгізу қарастырылған.
Ботагөз Айтжанова
Сурет: Бауыржан Жуасбаев
