60 мың қызылордалық спортпен жүйелі айналысады
5 Желтоқсан, 2013 16:49
Шамамен 60 мың қызылордалық спорт және дене шынықтырумен жүйелі шұғылданады, деп хабарлайды облыс әкімдігінің баспасөз қызметі.
«Статистикалық көрсеткіштер бойынша, 2013 жылы спорт және дене шынықтырумен жүйелі түрде шұғылданатын қызылордалықтардың саны 59 961 адамды құрады», - делінген хабарламада.
Дене шынықтыру және спорт бөлімі басшысы А.Жаманқұлдың айтуынша, қалада 509 спорттық нысан жұмыс істейді. Ал Тасбөгет және Қызылжарма тірек ауылдарында 2015 жылы спорт кешендерінің құрылысы басталмақ.
Сонымен қатар, спорттық-қоғамдық шараларды өткізуге және дене шынықтыру мен спортты дамытуға биыл бюджеттен 18 млн теңге бөлінген.
Айта кету керек, 20 қыркүйек пен 20 қазан аралығында оқу орындарында, Қызылорданың кәсіпкерліктері мен өзге ұйымдарында 50 мың адам қатысқан Президенттік тест тапсыру өткізілді.
