Азық-түлік корпорациясы қазақстандық бидайды Қытайға экспорттауда

5 Желтоқсан, 2013 15:01

«Азық-түлік келісім шарт корпорациясы» ҰК» АҚ (Азық-түлік корпорациясы) қытайлық мемлекеттік компаниясымен жасаған келісім-шарт шеңберінде қытай нарығына азық-түлік бидайын жеткізуді бастады, деп «ҚазАгро» ҰҚ баспасөз қызметі хабарлады.

«Ағымдағы жылдың қараша айының соңында ҚХР-ға алғашқы бидай вагондары жөнелтілді. Жалпы Азық-түлік корпорациясының ҚХР ірі астық трейдерімен жасаған бітімге сәйкес 2013 жылдың соңына дейін 10 мың тонна бидай жеткізу көзделіп отыр. Аталған көлемді жеткізгеннен кейін қытай жағымен қазақстандық бидай экспорты көлемін ұлғайту бойынша келіссөздер жүргізілуі жоспарлануда», - делінген хабарламада.

Бидайды экспорттау аталған мемлекетке қазақстандық бидай мен ұн жеткізу туралы қытай жағымен келісімдер нәтижесі бойынша мемлекет Басшысының тапсырмасымен жүзеге асырылуда. Өздеріңіз білетіндей, Қазақстан мен ҚХР басшылары 2013 жылдың сәуір мен қыркүйек айларында өткен кездесуде екі елдің сауда-экономикалық ынтымақтастығы, сонымен қатар Қазақстаннан Қытайға бидай экспорттау сұрақтары қарастырылған болатын.

Бидайды жөнелту Азық-түлік корпорациясының Ақмола облысындағы уәкілетті НҚҚ бірінен іске асырылды.

Жалпы алғанда, Азық-түлік корпорациясы жоспар бойынша ағымдағы жылдың соңына дейін 200 мың тонна бидай экспорттауды көздеп отыр. Жеткізілімдердің негізгі бағыттары – Қытай, Иран, Ресей, Әзірбайжан.

Барлық жаңалықтар