Қазақстанда үлескерлік тұрғын үйлерге бақылау күшейтіледі

5 Қазан, 2016 17:34

Елімізде биылғы жылдың 10 қазанында «Тұрғын үй құрылысына үлестік қатысу туралы» ҚР заңы күшіне енеді. Енді үлескерлердің ақшасын құрылысқа тартуға және рұқсат беруге бақылау күшейтіледі. Бұл туралы Астана қаласының Мемлекеттік сәулет-құрылыс бақылауы басқармасы басшысының орынбасары Дәулет Досқұлов баспасөз мәслихатында мәлімдеді.

«Жаңа заңнамаға сәйкес, үлескерлердің ақшасын құрылысқа тартуға және рұқсат беруге бақылау күшейтіледі. Заңда үлескерлердің ақшасын құрлысқа тартуға рұқсат алудың 3 жолы қарастырылған. Олар: Кепілдендіру қорының кепілдігін алу; Екінші деңгейлі банктің жобасына қатысу; Тұрғын үйдің (тұрғын үй ғимаратының) қаңқасы тұрғызылғаннан кейін ақша тарту», - деді ол.

Баспасөз мәслихатында Дәулет Досқұлов жаңа заң бойынша құрылыс компанияларына қойылатын талаптарды атап өтті.Оның айтуынша, жоғарыда аталған 2-ші және 3-ші жол бойынша жергілікті әкімдіктің рұқсаты керек.

«Жаңа құжат бойынша құрылыс компаниясына бірқатар талап қойылады. Яғни, олардың жер учаскесі, мемлекеттік сараптаудан өткен жобаның құжаттамалық сметасы, мемлекеттің кешенді сараптамасы болуы шарт. Мемлекеттің кешенді сараптамасына үйдің құрылысына кететін шығындар, тиісті инженерлік коммуникацияларды қосу сияқты т.б. жұмыстар кіреді. Осы талаптар орындалса, құрылыс компанияларына жұмыс істеуге рұқсат беріледі. Туындаған сұрақтар бойынша Астана қаласы әкімдігінің 1414 саll орталығына хабарласуға болады», - деді басқарма басшысының орынбасары.

Барлық жаңалықтар