Словакия өзінің ЭКСПО-2017 көрмесіне қатысатынын ресми түрде растады

Астана қаласындағы Словакия елшілігінің өкілдерімен кездесу барысында «ЭКСПО-2017» көрмесінің комиссары Рапиль Жошыбаевқа Словакия Республикасы үкіметінің төрағасы Роберто Фицоның тиісті ресми хаты табысталды, деп хабарлады ҚР СІМ.

2010 жылғы қарашада Словакия Республикасының үкіметі жаңартылатын көздерден (ЖЭК) өндірілетін энергияға қатысты Ұлттық іс-қимыл жоспарын қабылдады. Жаңа жоспарда ЖЭК пайдалануды 2020 жылға қарай 14%-ға дейін ұлғайту болжанады. Осы жоспарда жаңартылатын энергияның басқа түрлерімен салыстырғанда биомассадан алынатын энергияға  басымдық берілуі тиіс екені көзделеді.

Словакия үкіметінің ресми позициясына сәйкес, биомасса қазбалы отын түрлерінен алынатын энергияны тиімді алмастыра алады және осылайша, жылу өндіру кезінде тұтынылатын табиғи газ көлемін азайтуға едәуір үлес қоса алады.

Осылайша, Словакия өзінің көрмеге қатысатынын растаған 104-ші ел болды. Бүгінгі таңда «ЭКСПО-2017» көрмесіне қатысатынын 17 халықаралық ұйым растады, 99 комиссар тағайындалды, 82 қатысу шартына қол қойылды.