Сенат Қазақстан мен Сербия арасындағы қосарланған салық тұжырымдамасы туралы заң жобасын қарайды

Парламент Сенаты Қаржы және бюджет комитетінің кеңейтілген отырысында «Қазақстан Республикасының Үкіметі мен Сербия Республикасының Үкіметі арасындағы табыс пен капиталға салынатын салықтарға қатысты қосарланған салық салуды болдырмау және салық салудан жалтаруға жол бермеу туралы конвенцияны және оған хаттаманы ратификациялау туралы» заң жобасы қаралды.

2015 жылғы 28 тамызда Астанада қол қойылған Конвенция мен Хаттама Қазақстан мен Сербия арасындағы инвестицияға қолайлы жағдай жасау арқылы экономикалық ынтымақтастықты нығайтуға бағытталған. Конвенция қосарланған салық салуды болдырмау мақсатында жасалған халықаралық екіжақты құжат болып табылады. Тараптар салық төлеушіге келісімге қатысушы мемлекеттердің бірінде тек қана бір рет салық төлеу мүмкіндігін қамтамасыз етеді.

Оған екінші мемлекетте салықтың төленген сомасы есептеледі немесе басқа мемлекетте салық салынған жалпы кірістің бөлігін салық салудан алып тастайды. Заң жобасында төмендетілген бағам бойынша кіріс пайда болған мемлекеттегі дивидендтер, пайыздар мен роялтилерге салық салынуы мүмкіндігі туралы ереже қарастырылған. Заң жобасы Палатаның қарауына жіберілді.