2017 жылдан бастап Қазақстанда алкогольге акциз 45 пайызға өседі

22 Қыркүйек, 2016 13:38

2017 жылдан бастап Қазақстанда алкогольге акциз 45 пайызға өседі. Бұл туралы бүгін Астанада салық салудың өзекті мәселелеріне арналған конференцияда ҚР Ұлттық экономика министрі Қуандық Бишімбаев айтты.

Ұлттық экономика министрлігі ҚР Қаржы министрлігімен бірлесіп салық салу мен кедендік әкімшілендіру бойынша заң жобасын әзірледі, ол алкогольдік өнімге, сыра мен темекіге акциздер мөлшерлемесін өсіруді қарастырады.

«2017-2019 жылдарға алкогольдік өнімге, сыра мен темекіге акциздер мөлшерлемесін бекіту жоспарланған. Алкогольдік өнімнің мөлшерлемесін арттырып жатырмыз. Осы ретте 2017 жылы литріне 2 000 теңгеге дейін, яғни алдыңғы жылмен салыстырғанда өсім 45 пайыз, 2018 жылы - 2 275 теңге (өсім 14 пайыз), 2019 жылы - 2 550 теңгеге (өсім 4 пайыз) өседі», - деді Қуандық Бишімбаев.

Министрдің айтуынша, қосарланған салық салуға жол бермеу және алкогольдік өнімді экспорттау кезінде отандық өндірушілердің бәсекеге қабілеттілігін күшейту мақсатында алкогольдік өнімді өндіру үшін пайдаланылатын немесе сатылатын этил спиртіне акциздің нөлдік мөлшерлемесін бекіту ұсынылып жатыр.Еске сала кетсек, 2016 жылдан бастап акциз құны 100 пайыздық спирттің литріне 1380 теңгеге өскен болатын.

Ботагөз Айтжанова

Барлық жаңалықтар