Қазақстанда мүмкіндігі шектеулі спортшылардың жеңісін бағалауды қайта қарау ұсынылды

«Бүкiл әлемде мүмкiндiгi шектеулi спортшылардың спорттағы жетiстiктерi денi сау адамдардың табысынан әлдеқайда жоғары бағаланады. Өйткенi олар жеңiс жолында тек қарсыластарын ғана емес, ең алдымен, өз сырқатын жеңуге күш салады», - деді А.Перуашев.

Депутаттың айтуынша, Олимпиада медалiн жеңiп алған спортшыларға 250 мың АҚШ долларына дейiн сыйақы белгiленген. Ал мүмкiндiгi шектеулi спортшыларға берiлетiн ең жоғарғы сыйақы мөлшерi - 50 мың АҚШ доллары.  Бұл денi сау спортшыларға тағайындалған сыйақы мөлшерiнен бес есе аз.

«Халықаралық аренада елiмiздiң мәртебесiн асқақтатын мүгедек спортшыларымыз отанында тиiсiнше бағаланбай жатыр. Бұл Конституциямызға да кереғар. Ата заңымызға сәйкес, бүкiл азаматтар тең және оларды алалауға болмайды. Сондықтан, депутаттың сенiмiнше, Олимпиада мен Паралимпиада чемпиондарына берiлетiн сыйақы мөлшерi тең болуы керек

«Бiздiң паралимпиадалық спортшыларымыздың жеңісі мүмкiндiгi шектеулi мыңдаған азаматты белсендi өмiр сүрiп, барынша еңбекке араласуына мүмкiндiк бередi», - деді  депутат.

Айта кетейік, Рио-де-Жанейро қаласында жазғы паралимпиадалық ойындар аяқталды. Қазақстанның мүмкiндiгi шектеулi спортшылары паралимпиадалық медальдар жеңiп алды. Раушан Қойшыбаева пауэрлифтингтен күмiс медаль, ал Зүлфия Ғабидуллина жүзуден паралимпиада ойындарының чемпион атанды.

Индира Кауметова