Астанада өтетін жәрмеңкеге Жамбыл облысының аграрилері 315 тонна өнім жеткізеді

20 Қыркүйек, 2016 20:43

ҚР Тәуелсіздігінің 25 жылдығына орай Астана қаласында «Тарихи терең Тараздан тағзым» атты Жамбыл облысының мәдениет күндері өтеді, деп хабарлады облыс әкімдігінің баспасөз қызметі.

Облыс делегациясы іс-шара аясында астаналықтарды үш күн бойы өңірдің тарихымен, мәдениетімен, жетістіктерімен таныстырады.Бұл күндері облыстық тауар өндірушілердің ауыл шаруашылық жәрмеңкесі, филармония әртістерінің қатысуымен мерекелік концерттер, театр спектакльдері мен қойылымдары және облыстық тарихи-өлкетану мұражайының өңірдегі ежелгі, ортағасырлық және қазіргі заманғы дәуірінен хабар беретін экспонаттардың көрмесі өтеді.

Мәдениет күндерінің аясында астаналықтардың назарына бірқатар мәдени бағдарламалар ұсынылады.

Сондай-ақ елорда тұрғындарына 24-25 қыркүйек күндері ауылшаруашылығы өнімдерінің жәрмеңкесі ұйымдастырылады. Онда жалпы көлемі 315 тонна болатын 30-дан астам өнім түрлері ұсынылады. Оның ішінде, ет және ет өнімдері, балық, көкөніс, жеміс-жидек, сүт , жұмыртқа, бакалея өнімдері және т.б. Тауарлар қаладағы бөлшек сауда бағаларынан 8-15 пайызға төмен сатылады.

Барлық жаңалықтар