Т.Дүйсенова: 80 мыңнан астам қазақстандық тұрақты жұмыспен қамтылды

«Ағымдағы жылдың сегіз айы ішінде жұмыспен қамту бағдарламасы аясында шамамен 112 мың азамат жұмыспен қамтамасыз етілді. Олардың ішінде 66,5 пайызы жұмыссыз отырғандар, 22,4 пайызы өзін-өзі  жұмыспен қамтыған азаматтар. Жалпы, бағдарламаға қатысқандардың ішінде бүгінгі күні 81 мың азамат тұрақты жұмыс орнына орналасты»,-деді Т.Дүйсенова.

Аталмыш көрсеткіштер өткен жылғымен салыстырғанда айтарлықтай жоғары. Министрдің айтуынша, ағымдағы жылы бөлінген қаражаттың сомасына орай жұмысқа орналасу деңгейі аталмыш көрсеткішке жетті.

«Егер жылдың басынан бастап бекітілген сома 37,8 млрд теңге болса, Мемлекет басшысының тапсырмасын орындау кезінде еңбек нарығында тұрақтылықты сақтау мақсатында, Тәуелсіздіктің 25 жылдығына орай, қосымша 90,6 млрд теңге бөлінді. Осылайша, бағдарламаға 128,4 млрд теңге бөлінді және оның аясында 14 мыңнан астам жоба іске асырылуда»,-деді министр.