Қарағанды облысында өнеркәсіп кәсіпорындарының өнімді өндіру көлемі 3,1%-ға өсті

Ағымды жылғы қаңтар-тамызда облыстың өнеркәсіп кәсіпорындары 1185,4 млрд. теңгеге өнім өндірді, бұл 2015 жылғы тиісті кезеңнен 3,1%-ға артық. Облыстың өнеркәсіп өндірісі көлемінің негізгі үлесі өңдеу өнеркәсібіне тиесілі – 79,5%, электрмен жабдықтау, газ, бу беру және ауа баптау – 9,6%, кен өндіру және карьерлерді қазу – 9,5%-ды, сумен жабдықтау; кәріз жүйесі, қалдықтарды жинау және бөлуді бақылау 1,4%-ды құрайды.

Ауыл шаруашылығының жалпы өнімінің (қызмет) шығару көлемі 2016 жылғы қаңтар-тамызда 106,9 млрд. теңгені құрады, бұл 2015 жылғы тиісті кезеңнен 1,4%-ға көп. Жоғарылау мал шаруашылығы өнімін өндірудің 2,6%-ға, оның ішінде сиыр сүтін өндірудің 3,3%-ға өсуіне байланысты.

Ағымдағы жылдың басынан бастап бөлшек сауда айналымы 425,1 млрд. теңгені құрап, өткен жылғы қаңтар-тамызбен салыстырғанда  2,7%-ға кеміді (тұрақты бағаларда).Бөлшек сауданың негізгі көлемін жеке сауда қызметін жүзеге асыратын және базарларда сауда-саттықпен айналысатын жеке тұлғалар қамтыды.  Олардың тауар айналымы 285,2 млрд. теңгені құрады немесе өткізудің жалпы көлемінен 67,1%.

Жүк тасымалдау көлемі 481,9 млн. тоннаны құрады, бұл 2015 жылғы қаңтар-тамызға қарағанда 0,1%-ға көп. Көліктің барлық түрлерімен, жеке тасымалдауды қоса алғанда, жолаушыларды тасымалдау 0,2%-ға өсіп, 1560,2 млн.адамды құрады.