Ғарыш аппаратының кешені қазақстандық спутник өндірісінің 55 пайызын қамтамасыз етеді – М. Молдабеков

3 Желтоқсан, 2013 15:22

2015 жылы елiмiзде ғарыш аппараттарын құрастыру-сынау кешенi құрылады деп жоспарлануда, ол спутник өндірісінің 55 пайызын қамтамасыз етеді. Бұл жөнiнде ҚР Президентi жанындағы Орталық коммуникациялар қызметiнде өткен брифинг барысында ҚР Ұлттық ғарыш агенттігі басшысының орынбасары Мейірбек Молдабеков мәлiмдедi.

«2015 жылы Қазақстанда ғарыш аппараттарын құрастыру-сынау кешенi құрылады. Осы жобаны iске асыруда стратегиялық әрiптес ретiнде ғарыш саласындағы әлемдiк көшбасшылардың бiрi EADS Astrium атты француз компаниясы таңдалып алынды. Кәсiпорын түрлi тағайындамадағы спутниктердi жасайтын болады. Байланыс спутнигi, жердi қашықтықтан зондтау спутниктерi, ғылыми-технологиялық спутниктер ҒА ҚСК-де құрастырылады және сынақтан өткiзiледi», - дедi ол.

Оның айтуынша, кешен қолданысқа 2015 жылы енеді деп жоспарлануда. Ол қазақстандық спутник өндірісінің 55 пайызын қамтамасыз етеді. Оның 10 пайызы құрастыру-сынау, 30 пайызы –жоспарлау, 10 пайызы – кешенді дайындау.

«Бұл кәсіпорын ТМД елдерінде үйлесім табады. Себебі ТМД кеңістігіндегі технологиялар кеңестік кезеңнен қалған. Біз бұл орайда Ресейді басып оздық. РФ қазір ғана батыстық технологиялар арқылы осы сынды кешендерді тұрғызуды жоспарлауда. Кәсіпорын тек қана қазақстандық спутник емес, экспотқа да шығаратын технологиялар әзірлейді», - деді М. Молдабеков.

Барлық жаңалықтар