Астанада Қазақстан машина жасаушыларының IV форумы өтіп жатыр
16 Қыркүйек, 2016 09:54
Астанада Қазақстан машина жасаушыларының IV форумы өз жұмысын бастады. Форум тақырыбы: «Дамыған машина жасау саласы – бәсекеге қабілетті Қазақстан» деп аталады. Форумға ҚР Премьер-Министрінің орынбасары Асқар Мырзахметов қатысып жатыр.
Шараға 20 елден келген 180 делегация және қазақстандық машина жасау өнеркәсібіндегі ірі өндірушілер қатысуда. Форумның негізгі мақсаты - отандық машина жасау саласының даму әлеуетін көрсету және әлемдегі өнеркәсіп алыптарын ынтымақтасуға тарту.
«Жыл сайын біздің форумның нәтижесі бойынша жобалардың саны артуда. Жалпы отырыстардан кейінгі секциялық отырыстарда келешектегі машина жасаудың маңызды мәселелері талқыланатын болады. Бұл тау-кен, энергетика, көлік және темір жол саласы, қорғаныс өнеркәсібі»,-деді «Қазақстан машина жасаушылар Одағы» ЗТБ төрағасы Мейрам Пішембаев.
