Алматыда еліміздегі ең ірі жылыжай кешені іске қосылды (ФОТО)

Қаланың Индустриалды аймағындағы 17 га жерге орналасқан «BRB APK» ЖШС-нің бұл жобасының қуаты жылына 7000 тоннадан астам экологиялық таза қияр мен қызанақтар шығарады. Алматы әкімі Бауыржан Байбек жылыжайды аралап көрді.

«Бұл жоба – Мемлекет басшысының ірі қалалар жанынан азық- түлік белдеуін құру жөніндегі жобасының жүзеге асуы. Осылайша біз мегаполисті азық- түлікпен қамтамасыз ету бойынша стратегиялық міндетті, маусым арасында көкөніс бағасын тұрақтандыруды шешеміз.Біз көкөніс өнімдерінің жылыжайдан бірден сауда орындарына түсуі әрі тұтынушылардың барынша сапалы өнім алуы үшін барлық жағдайларды жасаймыз», - деді әкім.

Алматылықтар отандық өнімге биылғы жылдың қараша айында қол жеткізе алады. Өнімнің 80% қаланың сауда орындарымен жасалған меморандумдар арқылы өсіріледі.

Атап өтерлік жайт, қала базарының 70% -ын Қытай мен Өзбекстаннан жеткізілген өнімдер құрайды. «BRB APK» компаниясының көкөністері ішкі нарықтың бестен бір бөлігін қамтамасыз етеді.

Голландиялық қондырғылар мен бұрқақтау арқасында су да үнемделуде. Жылыжайдың іске қосылуы барысында 150 тұрақты жұмыс орны пайда болды.