Риддерде облыстық бюджет қаражатына екі тұрғын үй салынады

14 Қыркүйек, 2016 10:12

Шығыс Қазақстан облысының басшысы Даниал Ахметов Риддер қаласындағы «ЛК ГЭС» ЖШС-да, құрылыс және ауыл шаруашылық нысандарында болып қайтты, деп хабарлады ШҚО ақпараттық орталығы.

ШҚО-ның Риддер қаласында «ЛК ГЭС» ЖШС-да су құрылысын қайта қалпына келтіру бойынша жұмыстар жүргізілуде. Басшылықтың жоспары бойынша кәсіпорында жылдың соңына дейін екі турбина іске қосылады және ол 27 МВт электр энергиясын өндіретін болады.

Сонымен қатар, қалада жылдың соңына дейін 280 орынға арналған балабақшаны пайдалануға беру жоспарланған.

«Нұр Отан» партиясының Риддерлік филиалының ғимаратында Даниал Ахметов жеке мәселелер бойынша азаматтарды қабылдады және тұрғын үйдің құрылысы бойынша Риддер қаласында жиналыс өткізді. Жиналыс қорытындысы бойынша, облыс бюджетінен екі тұрғын үйдің құрылысына қаражат бөлу шешімі қабылданды»,-делінген хабарламада.

Сонымен қатар, аймақ басшысы хоккей модулінің қайта жөндеу жұмыстарымен танысып, тауарлы сүт фермасында болып қайтты.

Сапар барысында облыс әкімі «Arman Village» жобасы бойынша бизнес-жоспарды дайындауға тапсырма берді.