Нұрсұлтан Назарбаев Астанадағы «Әзірет Сұлтан» мешітінде болды

« Бүгін күллі әлемнің және Қазақстанның мұсылмандары жарқын мереке – Құрбан айтты мерекелеп жатыр. Баршаңыз білесіздер, 10 жылдан бері Құрбан айт пен Рождество демалыс күндері болып саналады. Бұл – ислам дініне де, христиан дініне де мемлекет қамқорлығының көрінісі», – деді Қазақстан Президенті.

Сондай-ақ, Нұрсұлтан Назарбаев тәуелсіздік жылдарында қол жеткен табыстың бәрі еліміздегі бірлік пен тыныштықтың арқасы екенін атап өтті.

«Әлемдегі әрбір дін бізді ынтымаққа, ізгілікке, бір-бірімізді құрметтеуге шақырады. Құранда өзің тоқ болып, көршің аш отырса, сен мұсылман болып саналмайсың делінген. Онда мұсылмандардың ағымға, жікке бөлінбейтіні де айтылған. Нағыз мұсылман – ел-жұртқа, қоғамға, Отанына көмектесетін, барлық дінді бірдей көретін адам», – деді Мемлекет басшысы..

Сондай-ақ, «Әзірет Сұлтан» мешітіне келген ҚР Президент Әкімшілігінің басшысы Әділбек Жақсыбеков, ҚР Сенат төрағасы Қасым Жомарт Тоқаев, ҚР Мәжіліс төрағасы Нұрлан Нығматулин, ҚР Премьер-Министрі Бақытжан Сағынтаев, ҚР қорғаныс министрі Иманғали Тасмағамбетов, Ұлттық қауіпсіздік комитетінің төрағасы Кәрім Мәсімов, Астана қаласының әкімі Әсет Исекешев, ПӘ хаттама қызметінің басшысы Мәди Атамқұлов және мәдениет және спорт министрі Арыстанбек Мұхамедиұлы сөз сөйледі.