Назарбаев зияткерлік мектебі білім күнін атап өтті

1 Қыркүйек, 2016 14:51

1 қыркүйек күні Астана қаласындағы Зияткерлік мектепте 2016-2017 оқу жылының бастамасы – алғашқы қоңырау салтанатты мерекесі атап өтілді. Мерекелік іс-шара Қазақстан Республикасы Конституция күніне, Тәуелсіздігімізге 25 жыл толуына және «Мәңгілік ел» ұлттық идеясы аясында ұйымдастырылды.

Халықаралық Бакалавриат жүйесіндегі Зияткерлік мектеп биылғы оқу жылында 40 сынып-комплекті құраған 800 астам оқушыға есігін ашты. Оның ішінде жаңадан оқуға түскен 7-сынып оқушылары. 6 сыныпты құраған жаңа оқушыларымыз осы жылдың ақпан-наурыз айларында сынақтан сәтті өтіп қабылданды. Оқушылармен қатар жаңадан келген мұғалімдер де мектеп қауымдастығына салтанатты түрде қабылданды.

Алғашқы Білім сабағы аясында мектептің жоғары сынып оқушылары алғаш рет дипломатия сабағына қатысты. Сабақтың арнайы лекторы болып - Қазақстан Республикасы Сыртқы Істер Министрлігінің жауапты хатшысы Анарбек Қарашев шақырылды.

Мектеппен таныстыру барысында қонағымызға химия, биология және физика сабақтарының кеңейтілген лабораторияларымен, кітапханасымен танысып, мектептің өмірінен, оқу жүйесінен хабардар болды. Кездесу барысында Анарбек Бақтығазыұлы оқушылармен Сыртқы Істер Министрлігінің жұмысымен, жоспарларымен таныстырып, дипломаттар мен елшілердің қызметі жайлы толығырақ тоқталып өтті. Жас ұрпақтың мәдениетаралық диалогтағы атқаратын рөлі туралы тікелей сұхбат аясында бірнеше сұрақтар қойылып, талқылау жүргізілді.

Барлық жаңалықтар