Елорданың үздік оқушылары Тұңғыш Президенті – Елбасының кітапханасындағы салтанатты шараға шақырылды (ФОТО,БЕЙНЕ)

1 Қыркүйек, 2016 13:34

Қазақстан Республикасының Тұңғыш Президенті – Елбасының кітапханасында «Мен туған елімнің патриотымын» тақырыбында білім сабағы өтті.

«Білім күніне арналған шараға елордалық мектептердің 70 оқушысы қатысты. Сабақ барысында ел Тәуелсіздігінің 25 жылында қол жеткен жетістіктер паш етіліп, елімізді дамуға жетелейтін «Мәңгілік ел» патриоттық актісі кеңінен талқыға салынды. Оқушылар Елбасы кітапханасындағы интерактивті үстелдердің көмегімен Мемлекет басшысының жаһандық бастамаларымен және идеяларымен, Отанға деген сүйіспеншілігін өнегелі ісімен дәлелдеген тұлғалардың өмірімен танысты. Оларға еліміздің тарихынан сыр шертетін түпнұсқалық құжаттар, бірегей суреттер ұсынылды», - деді Қазақстан Республикасының Тұңғыш Президенті – Елбасының кітапханасының атқарушы директоры Бейсенбай Жұмабеков.

Астаналық оқушылар Семей полигоны жабылуының 25 жылдығына және Қазақстан Республикасының Конституциясы күніне арналған екі көрмені тамашалап, талай жылдар құпия саналған құжаттардың тарихымен танысты.

Экскурсиядан кейін жастарға отансүйгіштіктің негізін ашатын «Білім.Тірек. Мәңгілік ел» тақырыбында деректі фильм ұсынылды.