«ҚТЖ» ҰК» АҚ 40 аз қамтылған отбасының балаларын мектепке қажет құралдармен қамтыды

31 Тамыз, 2016 17:24

Биыл жылда ұйымдастырылатын қайырымдылық шарасына 465 мыңнан астам қаржы бөлінді. Ол қаражатқа мектеп формасы мен сабақ оқуға қажетті құрал-жабдықтар сатып алынды, деп хабарлады «ҚТЖ» ҰК» АҚ баспасөз қызметі.

«ҚТЖ» ҰК» АҚ еншілес кәсіпорны «Теміржолсу» АҚ аталған акцияға белесене ат салысты.

«Теміржолсу» АҚ вице-президенті Мира Темірбекова мен бас маман Маржан Шақаева елордадағы жағдайы төмен және көп балалы жалғызбасты ана атанып отырған Ақтоты Рүстемованың үйіне барып, балаларына мектеп формасы мен оқу құралдарын табыстады.

«Бұл отбасыға «Мектепке жол» акциясынан тыс уақытта да көмек көрсетіп келеміз. Ақтотының 5 қызының біреуі – мүгедек. Төртеуі мектепте оқиды. Кіші қызының денсаулығына байланысты жұмыс істей алмайтындықтан әзірге тек мемлекеттік жәрдемақымен ғана күн көруде. Анасына құдай қуат берсін, балалар ақылды, білімді болып өссін», – дейді М. Темірбекова.

«Жалғыз өзім мына киімнің бәрін алып беруге шамам жетпейді. Қазір бәрі де қымбат. Менің отбасылық жағдайымды түсініп, шынайы жанашырлық танытып жатқан «Теміржолсу» ұжымына рахметімді айтамын», - деп А.Рүстемова алғысын білдірді.

Сондай-ақ, компания өкілдері Қоянды елді мекенінде тұратын көп балалы отбасына көмек көрсетті.

Республиканың барлық аймақтарында орналасқан Компанияның 13 филиалы «Мектепке жол» акциясы шеңберінде қайырымдылық шараларын өткізіп жатыр.