Астанада 1 қыркүйектен бастап өрт қауіпсіздігі айлығы басталады
31 Тамыз, 2016 19:02
1 қыркүйекте елордада өрт қауіпсіздігі айлығы басталады. Астана қаласы Төтенше жағдайлар департаментінің қызметкерлері аулаларды аралап, тұрғындарды өрт қауіпсіздігі ережелерімен ақпараттандырады.
Бұдан бөлек, жылыту пештерін қолдану ережелері арнайы көліктерде орнатылған дыбыс ұлғайтқыштары арқылы насихатталады, деп хабарлады қала әкімдігінің ресми сайты.
Тиісті ақпараттық жұмыстар жыл сайын қыркүйек айында өткізіледі. Тұрғын үйлерде орын алатын барлық өрттердің басым бөлігі жылыту маусымымен тұспа-тұс келеді. Бұл азаматтардың аталмыш мәселеге бей-жай, салғырт қарауынан орын алады.
Астана қаласының ТЖД қызметкерлері өрт қауіпсіздігі ережелерін білу өзіңізді және жақындарыңызды тілсіз жаудың құрсауынан сақтауға мүмкіндік беретінін еске салады.
