Биыл Қазақстанда 161 ауыл шаруашылығы кооперативі құрылады

23 Тамыз, 2016 12:07

Облыс әкімдіктерінің жоспарына сәйкес 2016 жылы 161 ауыл шаруашылығы кооперативтері құрылады. Олар өзіне 99 сүт қабылдау пунктін және 2 200-ден аса отбасылық шағын бордақылау алаңдарын біріктіреді.

АШМ хабарлағандай, осы мақсатқа «2020 жұмыспен қамту жол картасы» бағдарламасы аясында 11,5 млрд. теңге қарастырылған. Сондай-ақ, құрылатын ауыл шаруашылығы кооперативтерін қаржыландыруға ҚазАгро қаражаты есебінен 7,3 млрд. теңге көлемінде қаражат қарастырылған.

«Тек Оңтүстік Қазақстан және Жамбыл облыстары бойынша жыл соңына дейін 26 сүт қабылдау пункті, 782 жуық отбасылық бордақылау алаңдарын құру жоспарлануда. Бұлар ауылдық округтер ауқымындағы ауыл шаруашылығы кооперативтеріне біріктірілетін болады», - делінген хабарламада.

Айта кетейік, ағымдағы жылдың басынан бастап «Ауыл шаруашылығын қаржылай қолдау қоры» арқылы ел аумағындағы жеке қосалқы шаруашылықтар базасында ұсақ тауарлы өндірісті дамытуға 10,8 млрд. теңге көлемінде қаражат бөлінген. Қаржыландырылған өтінімдердің саны 4,4 мыңға жуық.

Барлық жаңалықтар