Қазақстандық теміржолшылар балалар үйіне қамқорлық көрсетуде

18 Тамыз, 2016 12:06

9 миллион теңгеден астам қаражатты Шығыс Қазақстан темір жол бөлімшесі төрт жыл ішінде өз қамқорлығындағы облыстық Балалар аулының шотына аударған, деп хабарлады «Қазақстан темір жолы» ҰК» АҚ.

Қазір теміржолшылардың қамқорлығында Балалар аулының алты тәрбиеленушісі бар. Жұмысшылар жылына бір рет бір күндік жалақыларын балалардың «Жилстройсбербанктегі» жеке шоттарына аударады. Осылайша, олар кәмелет жасқа толғанда баспаналы болуға мүмкіндік алады. Банктегі салымдар сенімді қорғалған. Оны тек балалардың өздері ғана пайдалана алады.

Патронаттық тәрбие идеясын «ӘТЖК» АҚ филиалы, Шығыс Қазақстан жол бөлімшесі аппараты, Защита станциясының дабыл беру және байланыс, локомотив және вагон пайдалану депосы, «Өскементранстелеком» ұжымы қолдады.

«ӘТЖК» АҚ Павлодар филиалының қызметкерлері Шарбақты балалар үйінің екі тәрбиеленушісіне екі жыл ішінде бір миллион теңгені жинап берді. 2014 жылдан бері сегіз жасар Айдана Құнанбаева мен жеті жасар Алексей Ганинге теміржолшылар тарапынан қаржылай қолдау көрсетілуде.

Алғашқы жылы балаларға 346 мың теңге жиналса, бүгінгі күні олардың шоттарына 957 мың жиналып, екі балаға теңдей бөлінді. Қамқорлық көрсеткендердің айтуынша, балалар кәмелет жасқа толғанша шоттарында жеткілікті сома жиналатындықтарына сенімді.

«ӘТЖК» АҚ аймақтық филиалының директоры Серік Балтиннің айтуы бойынша, Шарбақты отбасы үлгісіндегі балалар үйінің тәрбиеленушілері теміржолшылардың көптен бергі достары. Олар әр мереке сайын тәрбиеленушілерге сыйлықтар мен тәттілерін алып барады.

Барлық жаңалықтар