JOGMEC жапон корпорациясы алғаш рет Қазақстанда геологиялық барлау жұмыстарын бастайды

16 Тамыз, 2016 09:03

«Қазгеология» АҚ-та Қарағанды облысының Қыземшек учаскесінде жер қойнауын мемлекеттік геологиялық зерттеу жөніндегі бірлескен жобаны JOGMEC жапон корпорациясының өкілдері – геологтармен бірлесіп іске асыру жөнінде жұмыс бабындағы кездесу өтті, ИДМ баспасөз қызметі.

Жоба шеңберінде геологиялық барлау жұмыстары Қарағанды облысының Қаражал қаласынан 50 км орналасқан сирек металдар кен орындарында жүрізілетін болады.

«Бастапқы кезеңде компания сирек элементтер құрамының өнеркәсіптік маңызы бар екенін растау үшін сынамалар іріктеу жұмысын жүргізуді жоспарлауда. Алғашқы кезең жұмыстары 2 жыл мерзімге есептелген. Оң нәтиже алынған жағдайда, геологиялық барлау жұмыстары «Қазгеология» АҚ-тың JOGMEC-пен ынтымақтастығы орнатылып, жалғастырылады»,- делінген хабарламада.

Айта кетейік, JOGMEC (Japan Oil, Gas and Metals National Corporation) – жапон компанияларымен бірге мұнай, газ және металдар барлау, өндіру жобаларын іске асыратын жапон мемлекеттік корпорациясы болып табылады.

Корпорация бүкіл дүние жүзі бойынша мұнай, газ және қатты пайдалы қазбалар кен орындарын зерттеу әрі өндіру жөніндегі жобаларға қатысады, сондай-ақ геологиялық, геофизикалық зерттеулерді қоса алғанда, қоршаған орта үшін зиянсыз әдістерді пайдаланып, ғылыми зерттеулер жүргізеді.

JOGMEC геологиялық зерттеулер жүргізуді қоса алғанда, пайдалы қазбалар өндіру, сондай-ақ кен орындары қорларын есептеу жөніндегі жобаларға қолдау көрсетеді.

Барлық жаңалықтар