Алтынкөл станциясында бекітілген нормативтік уақыт бойынша 3 сағат 55 минуттың орнына 3 сағат 10 минутта контейнерлік пойыз қайта тиелді. «Қорғас–Шығыс қақпасы» АЭА-дағы Құрғақ портта 50 тонналық RMG отырғыш краны және екі RS ричстакерінің көмегімен 40 футтық контейнер қайта тиелімі жүзеге асырылды.

Алтынкөл станциясы мен «Қорғас–Шығыс қақпасы» АЭА ҚҰрғақ портының кадрлық құрамы мен барлық инфрақұрылымы үлкен көлемді жүк ағымын өңдеуге сақадай сай тұр. Бұл жерде кедендік ресімдеуді қоса алғанда жіңішке(1435мм) жолтабанға келген құрамды кең түріне (1520мм) жылдам өңдеп жүзеге асыруға болады.  

Белгілі болғандай, осы жылдың мамыр айында «ҚТЖ» ҰК» АҚ мен Үрімші темір жолы арасында шекара өткелдерінде жүктерді басымдықпен беру бойынша жұмыстарды ұйымдастыру жөнінде өзара уағдаластыққа қол жеткізілген.

Алтынкөл-Қорғас шекара өткелі контейнерлік жүк ағымын өткізуге бағытталған. Достық-Алашанькоу мемлекетаралық өткел нүктесі арқылы негізінен вагондардағы жаппай, үйілген жүктер мен габаритті емес жүктер тасымалы жүзеге асырылады.

Жалпы алғанда, Алтынкөл станциясы және «Қорғас–Шығыс қақпасы» АЭА арқылы контейнерлік транзитті дамытуда оң динамика байқалады.  Өткен жылы Алтынкөл арқылы 22 контейнерлік пойыз өткізілсе, осы жылдың 7 айында 51 контейнерлік пойыз өтті. Егер бұрын транзиттік құрам негізінен Орта Азия – Өзбекстан  және Қырғызстан бағыты бойынша жүрсе, енді басқа бағдарлармен жүретін болады.