Қазақстанда 2567 АӨК субъектісі қаржыландырылды

11 Тамыз, 2016 10:07

Үкімет отырысында ҚР Ауыл шаруашылығы бірінші вице-министрі Қ.Қ.Айтуғанов егін жинау жұмыстарын қаржыландыру мәселесіне тоқталды, деп хабарлады АШМ.

«Егін жинау жұмыстарын ұйымдасқан түрде жүргізу үшін ауыл шаруашылығы тауарын өндірушілерді бюджет қаражаты және «ҚазАгро» Ұлттық холдингінің қаржы институттарының қаражаты есебінен қаржыландыру бойынша шаралар қабылданды», - деді вице-министр.

«Жалпы алғанда, ағымдағы жылы көктемгі дала және егін жинау жұмыстарын қаржыландыруға «ҚазАгро» Холдингі бюджеттік кредит қаржысынан 60,0 млрд. теңге бағыттады», - деп атап өтті ол.

Қ.Айтуғановтың айтуынша, бұл тарапта «Аграрлық несие корпорациясы» АҚ арқылы – 36,0 млрд.теңге, «Азық-түлiк корпорациясы» ҰҚ» АҚ арқылы – 15,4 млрд. теңге және екінші деңгейдегі банктер арқылы - 8,6 млрд. теңге бағытталды. Сонымен, 2016 жылғы 1 тамыздағы жағдай бойынша жалпы сомасы 58,9 млрд. теңгені және жалпы егістік алаңы 5,1 млн. гектарды құраған 1835 өтінім – 2567 АӨК субъектісі қаржыландырылды.

Айта кетейік, аталған жиын «Егін жинау жұмыстарына дайындық барысы туралы» тақырыбымен өтті.