СҚО-да 1 мың нысан заңдастырылды

9 Тамыз, 2016 11:39

Солтүстiк Қазақстан облысында мемлекеттiк кiрiс органдары арқылы мүлiктi заңдастыру акциясы басталғаннан берi шетелдегi сомасы 31 миллион теңгенiң 9 жылжымайтын нысаны және 7 079 899,3 мың теңгенi құрайтын қаражат заңдастырылған, деп хабарлады облыс әкімдігі.

Мұндай ақпарат облыстық әкiмдiкте өңiр басшысы Ерiк Сұлтановтың басшылығымен өткен аппараттық кеңесте айтылды.

Мемлекеттiк мүлiктi жекешелендiру мен заңдастырудың ағымдағы жағдайы туралы қаржы басқармасының басшысының мiндетiн атқарушы Наталья Дышкант баяндады.

«674 өтiнiш бойынша 3 831 829 мың теңгенiң 1141 нысаны заңдастырылған. Бүгiнде 30 өтiнiш бойынша 117 099 мың теңгенiң 67 нысанын заңдастыру бойынша жұмыс атқарылуда», — деп хабарлады Наталья Геннадьевна.

Бүгiнгi таңда облыс аудандарында 12 миллион теңгенiң 2 нысаны жекешелендiрiлдi. Екiншi сауда бойынша Шал ақын ауданындағы «Жәрдем» КМК-не 3,3 миллион теңгеге және үшiншi саудадан Ғ. Мүсiрепов атындағы аудандағы «Еңбек» КМК-не 8,7 миллион теңгеге сатылды.

2016 жылы «ҰК «ӘКК «Солтүстiк» АҚ активтерi мен облыстың коммуналдық меншiгiнiң ұйымдастыру кестесiне сай өңiрдiң 15 ауданның тұрғын-үй коммуналдық шаруашылығы кәсiпорындары мен 2 КМК-ын ЖШС-не айналдыру мен әрi қарай сатылымға түсетiн («Мөлдiр су» КМК, «Жiгер» КМК) үлестерi жекешелендiрiледi.

Өңiр басшысы Ерiк Сұлтанов заңдастыру жұмыстарын жай-күйiн назарда ұстауды, сонымен қатар, жекшелендiрудi қысқа мерзiмде өткiзудi тапсырды.

«Аудан әкiмдерi жекешелендiрiлетiн әрбiр нысан үшiн жеке жауап бередi», — дедi Ерiк Хамзаұлы.