Әлеуметтік жағдайы төмен отабсылар үшін 6 тұрғын үй салынады

Меморандум аясында қаланың Алатау ауданында әлеуметтік жағдайы төмен отбасылар үшін 4 қабатты 6 тұрғын үй мен 120 орынды бала бақша салынады.

«Өткен жылы жалпы құны 40 млрд. теңгеден астам меморандумдарға қол қойылды. Жеке кәсіпкерлердің қолдауы арқасында қалада 158 спорт алаңдары пайда болды. МЖӘ аясында бала бақшалар көптеп ашылуда, сонымен қатар 4 мектеп пен 1 емхананың, өзге де объектілердің құрылыстары басталды», - деді Б.Байбек.

«Береке» қорының президенті Бағдаш Сүлейменов айтып өткендей, бұл меморандум Мемлекет басшысының бизнестің әлеуметтік жауапкершілігі жөніндегі саясатын жүзеге асыру болып табылады.

«Бұл істің басты мақсаты - тұрмысы төмен отбасыларға қол ұшын созу. Жағдайы төмен жанұялар мұндай үйлерде тегін тұра алады. Жалпы, біздің қорымыз көмекке мұқтаж жандарды оларға көмек берушілермен байланыстырады», - деді Б.Сүлейменов.

Естеріңізге сала кетейік, «Береке» қорының жұмыс істеп келе жатқанына 6 жыл, олар әлеуметтік жағынан аз қорғалған жанұяларға жан- жақты көмек көрсетіп келеді. Сонымен қатар, қор өзінің жеке ісін бастаған кәсіпкерлерге 1 млн. теңгеге дейін гранттар бере алады. Қазірдің өзінде 25 жас стартапер қаржылық көмек алды.