Түркия ЭКСПО-2017 көрмесінде баламалы энергетика саласында үздік әзірлемелерін таныстырады

5 Тамыз, 2016 16:32

Анкарада Қазақстан Республикасы Президентінің ресми сапары аясында Түркия Республикасында Түркияның ЭКСПО-2017 көрмесіне қатысуы туралы келісімге қол қойылды.

Құжатқа «Астана ЭКСПО-2017» Ұлттық компанияныБасқармасының төрағасы Ахметжан Есімов және «ЭКСПО-2017» түрік секциясының Комиссары, Түркияның энергетика министрінің орынбасары Тарық Сонмез қол қойды, деп ұлттық компанияда хабарлайды.

Кездесу барысында А.Есімов Түркия ЭКСПО-2017 көрмесін өткізу бойынша Қазақстанның кандидатурасын қолдағандығын және көрмеге қатысу үшін басым елдердің тізіміне кіретіндігін атап өтті.

«Көрмеде Түркия павильоны үлкен болады. Менің ойымша, Түркия ЭКСПО-2017 көрмесінде баламалы энергетика саласында үздік әзірлемелерін көрсететін болады»,-деді ол.

Қазіргі күні Анталия қаласында ЭКСПО-2016 бау-бақша көрмесі өтуде және ол жерде Қазақстан белсенді қатысуда.

Өз кезегінде экономика министрінің орынбасары Түркия ЭКСПО-2017 көрмесінде баламалы энергетика саласында үздік әзірлемелерін таныстыратындығын айтып өтті.

Естерінізге сала кетейік, ЭКСПО-2017 халықаралық мамандандырылған көрмесіне қатысушы-елдердің тізімін қалыптастыру екі бөлімнен тұрады – қатысулары туралы ресми түрде бекіту, содан кейін, қатысу туралы келісімшартқа қол қою.

Қазіргі күні 96 мемлекет ЭКСПО-2017 көрмесіне қатысатындықтарын ресми түрде мақұлдады, 62 мемлекет қатысу туралы келісімшартқа қол қойды.