Алматыда “Балапан” бағдарламасы бойынша 154 жеке меншік балабақша жұмыс істейді

2016 жылғы 1 тамыздағы көрсеткішке сай, қала бойынша мектепке дейінгі мекемелерге 48 мың 6 жасқа дейінгі бүлдіршіндер кезекте тұр, соның ішінде 3 жастан 6 жасқа дейінгілердің саны – 28 627 бала. Ал Әуезов ауданы бойынша 6 жасқа дейін кезекте тұрған балалардың саны – 9857, 3 жастан 6 жасқа дейінгілердің саны 5401 құрайды.

Бүгінгі күні аталған мәселені шешу үшін республикалық «Балапан» бағдарламасы іске асуда. Бұл бағдарлама бойынша ата-аналарға көмек ретінде бүлдіршіндердің жеке балабақшаларға баруына мемлекет тарапынан ай сайын 20 мың теңге бөлінеді.

Атап айтқанда, Алматы қаласы бойынша «Балапан» бағдарламасы  аясында 154 жеке мектепке дейінгі мекемелер, соның ішінде Әуезов ауданы бойынша 1036 орынға арналған 32 мекеме қызмет көрсетеді.

Осы орайда, тұрғындарды «Балапан» бағдарламасы аясында жеке балабақшалардың көрсететін қызметін ақпараттандыру мақсатында жәрмеңке ұйымдастырылды. Аталған жәрмеңкеде ата-аналарға қатысу шарты түсіндіріліп, балабақшалардың қызметтерін халық назарына ұсынылады.

2016 жылдың 23 шілдесі күні «Фэмили» саябағында «Балапан» бағдарламасы аясында жәрмеңке болып өтті. 500 адамды қамтыған шарада шығармашылық ұжымдардың концерттік бағдарламасы ұсынылып, демеушілердің тарапынан бүлдіршіндерге балмұздақтар, сусындар және аттракциондарға билеттер үйлестірілді.