Павлодар облысында әлеуметтік нысандарды жөндеуге 175 млн теңге бөлінді

3 Тамыз, 2016 16:19

Павлодар облысына Қазақстан Республикасы үкіметінің қорынан 3,7 млрд теңге түсті. Жақында аймақ қажеттіліктеріне тағы да 600 млн теңгеден астам қаражат түспек, деп хабарлады облыс әкімдігі.

Павлодар облысының әкімі Болат Бақауов аппараттық кеңесте аймаққа келіп түскен бюджеттік қаражат маңызды жобаларды іске асыруға арналғанын атап өтті. 1,2 млрд теңге Ақсу қаласының шағын аудандарына инженерлік-коммуникациялық инфрақұрылым салуға, 140 млн теңге Ақсу қаласында салынып жатқан көп пәтерлі тұрғын үйлердің сыртқы желілері мен абаттандыру жұмыстарына жұмсалатын болады.

376 млн теңге Кенжекөл ауылының су құбыры құрылысын жалғастыруға, 973 млн теңге «Жұмыспен қамту жол картасы 2020» бағдарламасы аясында ТКШ инфрақұрылымының ағымдағы орташа жөндеу жұмыстарына жұмсалмақ.

«Қосымша «Жұмыспен қамту жол картасы 2020» бағдарламасы бойынша әлеуметтік нысандарды жөндеуге арналған 175 млн теңге, Ленин және Майқайың кенттерінде, сондай-ақ Ақтоғай ауданының Жолболды ауылында, Успен ауданының Константиновка ауылында су құбыры жүйесі құрылысын бастауға 440 млн теңге түседі», - деп хабарлады аймақ басшысы.

Әкім барлық мемлекеттік сатып алуларды уақтылы өткізіп, бөлінген қаражатты мерзімінде игеруді тапсырды.