Абайдың туған жерінде отандық суретшілердің симпозиумы аяқталды

Бір апта бойы суретшілер Абай, Шәкәрім, Мұхтар сынды халқының ұлы перзенттерінің іздері қалған жерлермен жүріп, ауасын жұтып, көрікті де шежірелі Шыңғыстау өңіріне: Бөрілі, Күшікбай асуы, Тұма көлі, Жидебай, Үйтас, Кіші Орда, «Абай-Шәкәрім» кесенесі, Абай аналары - Ұлжан мен Зере зираты, Кеңгірбай би мазары, Шыңғыстау, Архат тауларының әсем жерлерінде, табиғат аясында плэнер өткізген болатын. 

Баспасөз конференциясын Абайдың «Жидебай-Бөрілі» мемлекеттік қорық-мұражайының директоры Б.Жүнісбеков алғысөзімен бастап, симпозиумға қатысқан суретшілерге ризашылығын білдірді. Аталмыш шарада Астана қаласынан келген ҚР Көркемөнер Академиясының толық мүшесі, Қазақстанның еңбек сіңірген өнер қайраткері, Суретшілер Академиясының төрағасы Ерлан Айтуаров, павлодарлық Қазақстан Суретшілер Одағының мүшесі, академик, Қазақстанның еңбек сіңірген өнер қайраткері Өсербай Шуранов, академик, ҚР Суретшілер Академиясының толық мүшесі, Қазақстанның еңбек сіңірген өнер қайраткері, астаналық Мәжит Байтенов және семейлік суретші,  Қазақстан Суретшілер Одағының мүшесі Тілеуғазы Жұбанышев сөз сөйлеп, Абай мұражайының әкімшілігіне алғыстарын білдіріп, мұражайға өз туындыларын тарту етті.

Көрмені тамашалаған келушілер атынан шежіреші, қаламгер М.Жанболатов ұлыларға тағзым етіп келген симпозиум қатысушыларына алғысын білдіріп, көрменің ерекшелігіне тоқталды.