Қазақстанда «Мектепке жол» қайырымдылық акциясы басталды

1 Тамыз, 2016 15:56

Биылғы жылдың 1 тамызынан бастап Қазақстанда «Мектепке жол» 9-шы республикалық акциясы басталды, деді ОКҚ брифингінде ҚР Білім және ғылым министрлігі балалар құқығын қорғау комитетінің төрағасы Мәншүк Әбдікәрім.

«Жыл сайын министрлік «Мектепке жол» акциясын әлеуметтік аз қамтылған отбасыларға көмек ретінде өткізеді. Биыл акция Тәуелсіздіктің 25 жылдығына арналған. Жыл сайын аталмыш акция аясында 300 балаға көмек көрсетіледі. 2015 жылдың қорытындысы бойынша жергілікті органдар 318 мың 26 оқушыны қамтыды, олар 2 млрд теңге көлемінде материалдық көмекке ие болды», - деді М.Әбдікәрім.

Министрліктің мәліметінше, өткен жылы көмекке ие болған балалардың саны 2014 жылмен салыстырғанда 20 мың адамға өсті. Бұл Қарағанды, Ақмола облыстарында орын алған табиғи апаттарға байланысты болып отыр.

«Бұл акция аясында Ішкі істер министрлігімен бірлесіп рейдтік шаралар өткізіліп тұрады. Рейдтік шаралар көмекке мұқтаж баласы бар отбасыларды анықтау. Өткен жылы 50 мың шара өткізілді. Нәтижесінде, 3 мың 588 кәмелетке толмаған бала көмекке мұқтж болып шықты», - деді ол.

Айта кетейік, 1 тамыздан бастап «Мектепке жол» қайырымдылық акциясы өткізілуде. Шара әлеуметтік аз қамтылған отбасылардың балаларына көмек көрсетуге бағытталған. Акция елдің барлық аймақтарында өткізілді. 8 жыл ішінде 2 млн адам қажетті көмекке ие болды. Биыл акция «Бақытты балалық мекені» ұранымен өткізілуде.

Ботагөз Айтжанова

Барлық жаңалықтар