Қазақстанда 2020 жылға дейін 28 инсульттік орталық құру жоспарланып отыр

1 Тамыз, 2016 15:09

Тәуелсіздік жылдарында Қазақстанда қан айналымы жүйесі ауруларынан (әрі қарай - ҚЖА) туындайтын өлім-жітім көрсеткіші 1,9 есеге төмендеді (1994 жылы 100 мың тұрғынға шаққанда 361-ден 2015 жылы 193,8-ге азайды), деп хабарлады ҚР Денсаулық сақтау және әлеуметтік даму министрлігінің баспасөз қызметі.

ҚР-дағы кардиологиялық және кардиохирургиялық көмекті дамытудың 2007-2009 жылдарға арналған бағдарламасының аясында ҚЖА-мен сырқаттанған адамдар мен мүгедектерді ерте диагностикалау, емдеу, медициналық оңалту мен оның алдын алудың тиімді тәсілдері енгізіліп, кардиохирургиялық бағыттағы мамандардың біліктілігін арттыру мен оларды даярлау мәселелері шешілді. Астана, Алматы және Павлодар қалаларында, М. Оспанов атындағы Батыс Қазақстан мемлекеттік медициналық академиясында аймақтық кардиохирургиялық орталықтар құрылды. Облыстық (қалалық) ауруханаларда кардиохирургиялық бөлімдер ашылды.

Кардиологиялық және кардиохирургиялық қызметті дамыту мен жетілдіру шаралары ҚР денсаулық сақтау саласын дамытудың 2011-2015 жылдарға арналған «Саламатты Қазақстан» мемлекеттік бағдарламасы аясында әрі қарай жалғастырылатын болады. Сонымен қатар, 40 инсульттік орталық құрылды. Бұл ҚЖА-дан болатын өлім-жітім санын азайтуға мүмкіндік берді. 2020 жылға дейін тағы 28 инсульттік орталық құру жоспарланып отыр.

Кардиохирургиялық оталар саны 2005 жылғы 838-ден 2015 жылғы 30 мың 249-ға дейін (оның ішінде ашық жүрекке 10 мыңнан астам ота мен 20 мың жедел интервенциялы ота) ұлғайды.

Барлық жаңалықтар