Қазақстанда электрондық маркалы конверттер пайда болады

Қосымша қызмет Қазақстан Республикасы бойынша қарапайым хаттарды жеткізудің сапасын жақсарту мақсатында енгізілген, деп хабарлады “Қазпошта” АҚ.

Электрондық маркалы пошталық конверт – бұл үстіне баспаханалық тәсілмен бірегей штрих-код қойылған конверт. Оның көмегімен жөнелтуші хаттың жүріп өту жолын, тіпті хаттың пошта жәшігіне түскенінше қадағалауға мүмкіндік алады. Жеке тұлғалар үшін жөнелтудің құны 100 теңгені құрайды.

Электрондық маркалы пошталық конвертті сату барысында түбіртекте конверттің штрих-кодының нөмірі көрсетіледі, ол арқылы жөнелтуші хаттың трекингін Post.kz.-те қадағалай алады. Хатты көшедегі пошта жәшігіне немесе бөлімшенің жұмыс тәртібін ескере отырып пошталық байланыс бөлімшесінде сала отырып кез-келген уақытта жөнелтуге болады. Хат пошташымен алушының абоненттік пошталық жәшігіне жеткізіледі, содан кейін пошташы жеткізу парағында «Абоненттік жәшікке түсірілді» деген белгі қояды, дәл сондай белгі бағдарламалық қамтамасыз етуде де қойылады.

Электрондық маркалы конверттерде қарапайым хаттарды жөнелту бойынша пилоттық жоба жеке тұлғалар үшін 2015 жылдың қазан айында Астана, Шығыс Қазақстан және Оңтүстік Қазақстан облыстық бөлімшелерінде іске қосылды. Пилоттық жоба жүргізілген мерзім ішінде  барлығы 8000 электрондық маркалы конверт сатылған және жүйе арқылы жүргізілген. Жақын уақытта жаңа қызмет барлық филиалдарда қолжетімді болады.