Астана – Павлодар бағытындағы жолдың бір тармағы ЭКСПО-2017 көрмесі қарсаңында пайдалануға беріледі

13 Шілде, 2016 10:16

Астана – Павлодар бағытындағы халықаралық маңызы бар жолдың бір тармағын ЭКСПО-2017 көрмесінің қарсаңында қолдануға тапсыру көзделіп отыр. Бұл туралы облыс әкімдігінде халықаралық көрмеге дайындық барысы туралы өткен кеңесте мәлім болды, деп хабарлады облыс әкімдігінің баспасөз қызметі.

ЭКСПО көрмесіне қарай жөнделуі тиіс жолдың бір тармағы Қалқаман – Баянауыл – Үміткер елді мекендерін байланыстырады.

«Қазіргі кезде бұл жобаны қайта құру жоспарына енгізу үшін оның техникалық-эономикалық негіздемесі әзірленіп жатыр. Бұл жол туралы шешім осы жылдың аяғына дейін қабылданатын болады» , - деп хабарлады Павлодар облысы әкімінің бірінші орынбасары Дүйсенбай Тұрғанов.

Аймақ басшысы атап өткендей халықаралық көрмеге дайындық шеңберінде жолдардың жағдайына ғана емес, жол бойындағы қызмет ошақтарына да көңіл бөлу қажет. Болат Бақауовтың пікірінше ЭКСПО-2017 туристік маршруттарының бойындағы барлық дәмханалар мен қонақ үйлерді қалыпқа келтіру қажет. Осыған байланысты ол жергілікті әкімдерге барлық нысандарды аралап, аталмыш мәселені бақылауға алуды тапсырды.

«Сонымен бірге, облысымыздағы барлық мұражайларды аудиогидтермен қамтамасыз ету керек», - деді әкім. «Жалпы мұражай гидтерінің дайындық деңгейі сын көтермейді. Мен соңғы кезде қаламыздағы тарихи-өлкетану мұражайында болғанымда олардың жұмыс сапасы көңілімнен шықпады».

Сонымен қатар, ЭКСПО-2017 көрмесінің өңірлік маршруттарында туристік көрсеткіштер, үш тілдегі ақпараттық стендтер, билбордтар орнату, автотұрақтар мен биодәретханаларды құру мәселесі басты назарда тұр.

Барлық жаңалықтар