Ақтөбе облысына өңіраралық кооперация аясында 500 тоннадан астам ауыл шаруашылық өнімдері жеткізілді

Президенттің тапсырмасын орындау мақсатында өңіраралық кооперацияны дамыту бойынша Ақтөбе облысының басшылығымен Қызылорда, Оңтүстік Қазақстан, Қостанай және Жамбыл облыстарының басшылары арасында тығыз байланыс орнатылған. Бұл жұмыстар азық-түлік қауіпсіздігін қамтамасыз ету, өндірістік өнеркәсіп, білім мен денсаулық сақтау бағыттары бойынша жүргізілуде, деп хабарлады «Ақтөбе ақпарат» орталығы.

Оңтүстік аймақтардан тікелей жеткізілгеннің арқасында жеміс, көкөніс, ет, күріш және тұз сияқты өнімдердің бағасын 10-нан 40 %-ға дейін төмендетуге мүмкіндік болды. Жыл басынан бері Қызылорда облысынан келісі 220 теңгелік 88 тонна күріш 150 теңгеден жеткізілген. 64 тонна «Арал тұз» тұзы келісі 37 теңгеден саудаланған. Қостанай облысынан 40 тонна ұн, 40 тонна сиыр еті, Жамбыл облысынан жеткізілген 80 тонна сәбіз келісі 45 теңгеден берілген. Сонымен қатар, 35 теңгеден 70 тонна пияз, 50 теңгеден 20 тонна қырыққабат жеткізілген. ОҚО-да осылай бақша өнімдерін жеткізуде.

Барлық аудандарда көрші аймақтардан азық-түлік тауарларын тікелей жүзеге асыратын аудандық операторлар белгіленген. Олар халыққа нарық бағасынан 15–20% арзан тауарларды жеткізумен айналысады.