Қазақстандағы ұдайы суарылатын ирригациялық инфроқұрылымды қалпына келтіру үшін 280 млрд астам теңге қажет - ҰЭМ

8 Шілде, 2016 11:13

Қазақстанның Премьер-Министрі Кәрім Мәсімовтің Қызылорда облысына іссапары шеңберінде ұдайы суарылатын ирригациялық су шаруашылығының инфроқұрылымын қалпына келтіру мәселелері бойынша республикалық отырысы өтті. Отырыс барысында Ұлттық экономика министрі Қуандық Бишімбаев осы бағыттағы жұмыстар туралы баяндады, деп хабарлады ҚР Ұлттық экономика министрлігінің баспасөз қызметі.

«Ауыл шаруашылығы министрлігінің мәліметтері бойынша сұранысқа ие 610 мың га суармалы жерлердің ұдайы және 350 мың га жайылма суарылатын, оның ішінде Қызылорда облысындағы 29 мың га ұдайы суарылатын ирригациялық инфроқұрылымды қалпына келтіру үшін еліміз бойынша жобаларды қаржыландыруға жалпы қажеттілік 281,7 млрд. теңгені құрайды», - деп хабарлады Бишімбаев.

Қысқа мерзімде Ислам даму банкі және Еуропалық қайта құру және даму банктерінен сомасы 314,1 млн. АҚШ доллары (106,2 млрд. теңге) мөлшеріндегі қарыз тартылатын жобалар әзірленетін болады. Қаржыландыру 2016 жылда тартылады деп болжануда.

«Жобалар 4 облыста 183,4 мың га жерге: Оңтүстік Қазақстан, Алматы, Жамбыл, Ақтөбе облыстарында іске асырылады, бұл 140 жұмыс орнын, егін шаруашылығында 54 мың тұрақты және 39 мың уақытша жұмыс орындарын құруға мүмкіндік береді», - деп хабарлады министр.

Сондай-ақ, Қызылорда облысындағы жобаларға екінші кезеңде 109,7 млрд. теңге мөлшеріндегі қаражатты Ислам даму банкінен, оның ішінде 16 млрд. теңге тарту жоспарланып отырғанын хабарлады.

Барлық жаңалықтар