Астана жастары жазда құрылыс отрядтарында жұмыс істейді
«Осы жылы 2 мыңнан астам жасты студенттік, құрылыс және жастардың еңбек жасағына жұмысқа орналастыруды жоспарлап отырмыз. Қазіргі уақытта мыңнан астам адам жұмысқа орналастырылды, тамызда бұл іс жалғасады. Жыл соңына дейін құрылыс пен қаланы абаттандыру нысандарында жұмысқа орналасқан жастардың саны едәуір ұлғаяды деп ойлаймын. Статистика бойынша, Астанаға жыл сайын шамамен 40-50 мың адам келеді. Бұл өз кезегінде баспана мәселесін шешуді де талап етеді. Қазір Тұрғын үй құрылыс жинақ банкінің желісі арқылы жас отбасылар үшін «Қолжетімді баспана» бағдарламасы қабылданған. Алдағы уақытта осы мәселелердің барлығы сатылай және жүйелі түрде шешіледі деп ойлаймын», – деді ол.
Рахманберді Астана жастары арасындағы қылмыс мәселесін де қозғады. Оның айтуынша, ішкі істер департаменті мен қала әкімдігі осы мәселенің көзін жою үшін түрлі шаралар қабылдап жатыр.
«Біз демалыс маусымы бастала салысымен «Мен және заң» акциясын іске қостық. Яғни, Астанаға келген немесе осы қалада тұрып жатқан әрбір жас жеткіншек өз құқығы мен міндетін білуі тиіс. Қай уақытқа дейін көшеде жүре алады, алкоголь, темекі және еңбекке қатысты мәселелердің жауабын білуіне бағытталды. Осы жылы жастар арасындағы қылмыс деңгейін азайтуға септігін тигізетін көптеген алдын-алу шараларын өткіземіз. Біз ол үшін бар күшімізді саламыз», – деді басшы.
