«Алматы –Маңғышлақ» пойызы Ақтөбе, Маңғыстау облыстарының 20-дан астам станциясын қамтыды

5 Шілде, 2016 18:24

Шалғайдағы Шалқар мен Тассай станциясының тұрғындары Алматыдан шілденің 3-інде шыққан №377/378 «Алматы-Маңғышлақ» жолаушылар пойызын салтанатты жағдайда күтіп алды, деп хабарлады «Жолаушылар тасымалы» АҚ баспасөз қызметі.

№377/378 «Алматы-Маңғышлақ» жолаушылар пойызы жаңадан ашылған Шалқар-Бейнеу темір жол телімі арқылы тұңғыш рет жолға шықты. Жаңа бағдар еліміздің ең шалғай темір жол бағдарын 14% немесе 471 шақырымға қысқартты. Станция тұрғындары бұл оқиғаны аймақ үшін аса маңызды деп танып отыр.

«Бұрын Ақтаудағы туыстарымызға бару үшін біз жеті жүз шақырымды бірнеше рет пойызға ауысып отыру арқылы өтетінбіз. Қазір біз уақытты және қаржымызды едәуір үнемдей алатын болдық»,-дейді жергілікті ақсақал Б. Оразбаев.

«Алматы –Маңғышлақ» пойызы Ақтөбе, Маңғыстау облыстарының бұрын темір жол қатынасы болмаған 20-дан астам станциясын қамтыды. Жолаушылар пойызы 9 сағатты үнемдейді. Қашықтықтың қысқаруына байланысты пойыз құны купелік вагондарға 11,46%, плацкарттық вагондарға 11,32% қысқарады.

2016 жылы наурызда «Жезқазған- Сексеуіл – Қызылорда» бағдарындағы жолаушылар пойызы 40-тан астам елді мекенді қамтиды. Бұрын Жезқазған мен Қызылорда аралығында темір жол қатынасы болмаған еді.

Ұлттық тасымалдаушы компания Астана-Алматы, Алматы- Шымкент бағдарына арнап, «Тұлпар-Тальго компаниясының кең шанақты 149 вагонын алуды жоспарлап отыр.

Барлық жаңалықтар