• Басты
  • «Батыр арулар» байқауының жеңімпаз әскери қызметшілері жауынгерлік жағдайда сыналды (ФОТО)

«Батыр арулар» байқауының жеңімпаз әскери қызметшілері жауынгерлік жағдайда сыналды (ФОТО)

4 Шілде, 2016 19:42
ҚР ҚК 36-шы десанттық-шабуылдау бригадасының полигонында жауынгерлікке жақындатылған жағдайда екінші республикалық «Батыр арулар» байқауының жеңімпаз әскери қызметшілері сыннан өтті, деп хабарлады Қорғаныс министрлігінің баспасөз қызметі.

Танктің астында жату, жауынгерлік керек-жарақпен кедергілер жолағынан өту, БТР-ды жүргізу және арнайы тапсырманы орындау, міне мұның бәрін 12 жеңімпазға өздерінің жауынгерлік әзірлігі және дене даярлығын дәлелдеу үшін орындауға тура келді.

Жауынгерлік сынақ кезеңдерінің өтуі – бұл «Батыр арулар» байқауының міндетті басты шарты. Оның қатысушылары тек әйел, аяулы ана, асыл жар ғана емес, олар – кез-келген уақытта Отанын қорғауға бек дайын, жауынгерлік әзірлігі жоғары әскери қызметшілер.   «Соғыс алаңында ерсің бе, әйелсің бе ешкім де аңғармайды.

Тек қарсылас пен орындауға міндетті тапсырма ғана бар. Сондықтан да армияда қыздарға ешбір жеңілдіктің болмағаны әділдік деп есептеймін. Әскери қыз-келіншектер ер азаматтармен иық тіресе ең күрделі деген тапсырмалардың өзін тең дәрежеде орындайды. Мұндай жауынгерлік сынақтарға қатысу – бұл біздің әзірлігімізді көрсету мен әрине, өз күшімізді сынау деп білеміз.

Сынақ күрделі болды. Дегенмен, біз бір команда ретінде жұмылып барлығын орындадық. Біз нағыз арнайы бөлімшеге айналдық», - дейді қатысушылардың бірі ҚР Қорғаныс министрлігі Бас әскери-клиникалық госпиталі жақ және бет хирургиясы бөлімінің аға маманы Айжан Мұсаева. Жауынгерлік сынақтан бөлек байқау жеңімпаздарын кәсіби стилистердің қолынан әрлеу және мамандандырылған күнтізбеге арналған фотосессия мен ресми марапаттау күтіп тұр.

Әскери қыз-келіншектер арасындағы республикалық «Батыр арулар» байқауы осымен екінші мәрте ұйымдастырылып отыр. 12 үздіктің қатарында болу үшін 80-нен астам қазақстандық армияның әртүрлі тектері мен түрлерінен байланысшы, десантшы қыздардан бастап әскери дәрігер және өнерпаздарды құрайтын 80-нен астам өкіл қатысқан болатын. Ашық онлайн дауыс берудің қорытындысы бойынша ҚР Қарулы Күштерінің әскери мамандық иегерлерінің 12 өкілі анықталды. 

 

Барлық жаңалықтар