Н.Назарбаев олимпиадалықтарды қазақстандық спорттың әлеуетін тағы бір мәрте барша әлемге танытуға шақырды

 «Рио-де-Жанейрода өтетiн Олимпиада ойындарына бiр айдай уақыт қалды. Бұл жиын Қазақстанның 25 жылдығы қарсаңында болайын деп отыр. Сондықтан, сiздерге өте үлкен сенiм жүктеледi. Олимпиадаға әлемнiң түрлi елiнен 10 мың спортшы келедi. Барлығы кiлең дүлдүлдер. Барлығының жеңгiсi келедi. Сондықтан 26 спорт түрiнен 100-ден астам жолдама алдық. Баршалырыңызға табыс тiлеймiн. Бұл көрсеткiш жаман емес, бiрақ, жолдаманың саны емес, спортшылардың сапасы қажет», - дейдi Елбасы спортшылармен дәстүрлi кездесуiнде.

Жалпы, Нұрсұлтан Назарбаев айтып өткендей, Қазақстанның ұлттық құрамасы Рио-де –Жанейродағы Олимпиада басталуына дайын.

 «Бізде спортқа ерекше мән беріледі, оны баршамыз білеміз. Соңғы үш жылдың ішінде олимпиадалық резервтің кешенді дайындалуы үшін  халықаралық деңгейдегі спорт нысандары салынды. Бұл Дүниежүзілік бокс академиясы, Алматыдағы дзюдо академиясы, «Тараз-арена», «Қарағанды-арена» мұз  сарайы мен  елордадағы көпфункционалды мұз сарайы», - деді Елбасы.

Айта кетейік, спортшылар мен жанкүйерлер тағатсыздана күткен төртжылдықтың басты додасы биыл тамыздың 5-21 аралығында Бразилияның Рио-де-Жанейро қаласында өтедi. Бұл – Оңтүстiк Америкада өтетiн алғашқы Олимпиада ойындары болмақ.

Индира Кауметова