Е.Ыдырысов: БҰҰ ҚК құрамына сайлану – ҚР-ң әлемдегі дамыған 30 елдің қатарына кіру жолындағы маңызды қадам

2 Шілде, 2016 10:31

2016 жылдың 1 шілдесі күні Сыртқы істер министрлігінде Қазақстан Республикасының дипломатиялық қызмет Күніне орай салтанатты жиын өтті.

Ұжым алдында сөз сөйлеген ведомство басшысы Ерлан Ыдырысов сыртқы саясат ведомство қызметкерлерін кәсіби мерекелерімен құттықтады, деп хабарлады ҚР СІМ-і.

СІМ басшысы қазақстандық дипломатияның негізгі жұмыстарының нәтижелері мен алда атқарылуы керек жұмыстарды да айтты. Ол сондай-ақ, Қазақстанның Біріккен ұлттар ұйымы Қауіпсіздік Кеңесінің құрамына сайлануы қазақстандық дипломатияның жаңа тарихындағы үлкен жетістіктердің бірі екенін атап өтті.

«Бұл ең алдымен Мемлекет басшысының үлкен жеңісі, сонымен қатар, Қазақстан дипломаттарының да қосқан үлесі орасан. Біздің алдымызға міндет қойылды, біз оны лайықты орындауға тырыстық. Енді Сыртқы істер министрлігінде жұмыстың жаңа кезеңі басталады. Бізге үлкен жауапкершілік жүктеледі»,-деп атап өтті министр.

«БҰҰ ҚК құрамына сайлану – бұл ҚР-ң әлемдегі дамыған 30 елдің қатарына кіру жолындағы маңызды қадам»,-деп толықтырды сөзін министр.