ҚР Президенті телекөпір барысында Алматыдағы май өнімдерін шығару кешенін іске қосты

«Өткен жылы шетелдік инвесторлар Кеңесінде сіз біздің Қазақстанда май өндіру кластерін құру жөніндегі жобамызды мақұлдадыңыз. Биыл біз 11 млрд. теңгеге Алматыдағы жұмыс істеп тұрған кәсіпорынды қайта жаңғыртудан өткіздік», - деді кәсіпорын директоры Нұржан Қожамұратов.

Оның айтуынша, әлемдік тәжірибе бойынша кәсіпорын жанынан оқыту орталығы ашылған.

«Биыл біз 11 млрд теңгеге Алматыдағы зауытты жаңғырттық, жаңа технологиялар енгіздік. Біз өндіріс көлемін арттырып, келешекте Орталық Азияда негізгі май өнімдерін өндірушіге айналуды көздеп отырмыз», - деді телекөпір барысында кәсіпорын басшысы.

Өз кезегінде Президент бұл өндіріс ошағының маңыздылығын атап өтті.

«Бұл өте маңызды өндіріс. Қазір Қытайда өсімдік майының жаңа нарығы ашылып отыр. Сондықтан өндірістің әлеуеті зор. Өндіріс көлемін арттырып, сапалы, бәсекеге қабілетті өнім шығару керек», - деді Н.Назарбаев.

Айта кетейік, Мемлекет басшысы Нұрсұлтан Назарбаевтың қатысуымен индустрияландыру бағдарламасына арналған дәстүрлі жалпыұлттық телекөпір өтуде. Шара барысында индустриялық-инновациялық даму бағдарламасының  2016 жылдың бірінші жартыжылдығындағы қорытындысы шығарылып, екінші жартыжылдықтағы міндеттер айқындалады.  

Индира Қауметова