22 Маусым, 2016 16:57

Сейшел Аралдары Республикасы «ЭКСПО-2017» көрмесіне қатысуын растады

Сейшел Аралдары Республикасының астанасы Викторияда Қазақстан Республикасының арнайы өкілі Бағдад Әміреев елші аталған елдің Сыртқы істер министрі Джоел Морганмен кездесті, деп хабарлады Сыртқы істер министрлігінің баспасөз қызметі.

Сұхбат барысында тараптар Қазақстан мен Сейшел арасындағы түрлі салалардағы екіжақты ынтымақтастық мәселелерін талқылап, халықаралық және өңірлік күн тәртібіндегі бірқатар проблемалар бойынша пікір алмасты.

Сейшел министрі өз елінің «ЭКСПО-2017» халықаралық мамандандырылған көрмесіне қатысатынын растап, осы іс-шара қайта қалпына келетін энергия, сондай-ақ ғылым мен жаңа технологияларды дамыту салаларындағы өзара тиімді ынтымақтастықты бастауға мүмкіндік беретіндігіне үміт білдірді. Сондай-ақ, ол екі елдің туризм саласындағы дамуын құптайтынын айтты.

Б. Әміреев Сейшел тарапына Қазақстанның халықаралық бастамаларын қолдағаны үшін алғыс білдірді және екі мемлекеттің сыртқы саясат ведомстволары арасында барынша қарқынды байланыстар орнатуды жақтап сөйледі. Қазақстандық дипломат Қазақстан мен Сейшел арасындағы сауда-экономикалық ынтымақтастық пен туристік алмасу маңыздылығын атап өтті.

Барлық жаңалықтар